جميع المقالاتنصائح للمصورين

إزاي تدخل عالم التصوير ؟!

عالم جميل و مثير لاهتمام معظم الشباب , لو بتسعي إنك تتعلم التصوير الفوتوغرافي مهم إنك تبدأ بداية صح , و عشان تعرف تحط رجلك على أول سلمة في مجال التصوير لازم تقرأ النصائح دي و تركز فيها كويس .

محتويات المقال

  • الدافع .
  • متصرفش كتير .
  • التعليم و التدريب .
  • الممارسة و التطوير .
  • التخصص .
  • التخطيط .
  • شارك صورك .
  • الأختلاف.

1 – الدافع

– عشان تدخل عالم التصوير لازم يكون عندك دافع قوي و شغف كبير عشان تقدر تواجه الصعوبات الي هتواجهك في طريقك لإحتراف التصوير.

2 – متصرفش كتير

– خليك عارف إن الصورة الجيدة بتعتمد 99% عليك أنت كمصور و 1% علي الكاميرا لإن بكل بساطة الكاميرا هي وسيلة لتجسيد إبداعك و أفكارك في التصوير مش هي المبدع ( بتلعب دور كبير طبعا لكن مش الأساس نهائيا ) فنصيحتي ليك متهتمش إنك تشتري كاميرا غالية قد ما تهتم بتدريب نفسك و التفكير في أفكار و إبداعات جديدة و بعد كده ممكن تستثمر فلوسك في معدات تفيدك في المستقبل .

3 – التعليم و التدريب

– مهم جدا إنك تذاكر كويس و تعرف إزاي تكبر نفسك و تزود معلوماتك عن المجال ده , خد كورسات علي قد ما تقدر و لو مش هتقدر عشان التكلفة هتلاقي كورسات كتير أونلاين لمصورين محترفين هيفيدوك جدا و تقدر تتعلم منهم أساسيات التصوير و إزاي تعرف تعدل علي صورك بكل سهولة باستخدام برامج التعديل المشهورة مثل : Lightroom , Photoshop .

[ الفرق بين Lightroom و Photoshop ؟؟!! ]

و من المهم اوي إنك تتعلمة أيه هي المصطلحات المنتشرة و المشهورة بين المصورين عشان يسهل عليك أي مذاكرة أو كورس تحضره و ده ممكن تقرأ عنة في مقال مخصص هنا بالتفصيل .

صورة كاميرا مع خريطة

4 – الممارسة و التطوير

– حاول دايما تطور من نفسك و تنيمها , مارس التصوير بشكل يومي فبقدر الإمكان خلي معاك الكاميرا دايما في أي مكان , و إعمل لنفسك تغذية بصرية عن طريق إنك تتفرج علي صور كتير لمصورين محترفين و خليك متأكد إن المعلومة الي سمعتها مهما كنت فاهمها و حافظها لازم تجربها و تمارسها و تتدرب عليها عملي لأن الممارسة أفضل مليون مره من التعليم النظري.

– لازم تتدرب علي التصوير في كل الأوقات و كل الظروف ( صبح – ليل – غيوم …ألخ ) .

– إتعلم على كاميرتك كويس وإعرف كل زر مهمته ايه و إعرف كل مميزاتها و الأوضاع المتوفرة فيها.

5 – التخصص

– حاول تتخصص في نوع تصوير معين سواء كان ” طبيعة – أشخاص – رياضة – حفلات زفاف ….ألخ ” لأن ده هيساعدك في إختيار معداتك صح من عدسات أو فلاشات و ده هيخليك متصرفش فلوسك علي حاجه ممكن متفيدكش .

6 – التخطيط

– ده يعتبرمن أهم النصائح فانت لازم تخطط لكل صورة هتصورها بالورقة و القلم علي سبيل المثال : لو هتعمل سيشن تصوير لمجموعة من الأشخاص مهم اوي تروح المكان الي هتصور فيه , تعرف عدد الأشخاص الي هتصورهم , لبسهم , ألوانهم و تحدد الأوضاع الي هتصورهم بيها.

7 – شارك صورك

– شارك صورك دايما عالمواقع و بين الناس المهتمين بالتصوير عشان تعرف نقاظ ضعفك فممكن شخص يقولك علي عيب في الصورة انت متلاحظهوش و استقبل التعليقات السلبية بصدر رحب .

8 – الأختلاف

– عالم التصوير ملئ بالمصورين المحترفين إسمهم لامع و صورهم إبداعية فانت عشان تعرف تدخل وسطهم لازم يكون شغلك ملفت عشان تقدر تزاحمهم عن طريق صورة بفكرة جديدة و لمسة خاصة تميزك عن أي مصور تاني أو مكان جديد يلفت نظر الناس بكدة تقدر تكون لنفسك جمهورك الخاص بيك .

– في النهاية لازم تحط قدام عينيك حاجتين مهمين , أولهم : إنك متخجلش أبدا من طلب المعرفة من حد , ثانيا : خليك متواضع دايما عشان توصل لجمهورك ببساطة مهما وصلت للأحترافية سواء كان في استقبال أو توصيل معلومه ممكن تفيد غيرك بيها .


اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق